Thursday, January 11, 2007

MANEHO ESTRICTO DI ADMINISION DUNANDO SU FRUTONAN DEMOGRAFICO

VELOCIDAD DI CRECEMENTO A DISMINUI

Fin di aña pasa, Oficina Central di Estadistica a publica su boletin demografico pa e di tres cuartal di 2006. E datonan presenta ta masha interesante y ta duna espacio pa analisa y evalua tanto nos desaroyo demografico como e maneho di admision, cu ta determinante den e proceso di crecemento di nos poblacion. Den e relato aki mi ta pone e cifranan banda di otro y purba di indica of mustra e desaroyo demografico cu nos isla ta pasando aden.

GRANDURA Y CONSTELACION DI POBLACION
Na final di e tres cuartal di 2006, esta na final di dia 30 di september 2006, segun datonan di registro civil, Aruba tabata conta cu un total di 103.102 habitante. Un 47.6% di e poblacion ta hende homber, 13.3% ta mucha, 14.5% ta teenagers mientras cu 12.9% di e poblacion ta riba 60 aña.

CRECEMENTO DI POBLACION
Un poblacion ta crece mediante nacemento di baby y imigracion di persona y ta decrece mediante fayecimento y emigracion. Migracion ta resultado entre imigracion y emigracion.

NACEMENTO
Durante e prome tres cuartalnan di 2006 un total di 894 mucha a nace. E cifra aki no ta diferencia mucho di e prome tres quartalnan di añanan anterior. Aki bao ta sigui un bista:
2002: 816
2003: 847
2004: 802
2005: 892
Ariba totalidad di henter un aña, e cifra di nacemento ta varia entre 1.150 pa 1.260, cual ta basta stabil.

FAYECIMENTO
Durante e prome 3 cuartalnan di 2006 un total di 402 persona a fayece, di cual 25% ta personanan entre 70 pa 79 aña di edad. Remarcable ta e cantidad di 7 baby bao di 1 aña cu e fayece durante e periodo aki. E cifranan di fayecemento tambe ta basta stabil. E ultimo 5 añanan aki a fayece entre 480 pa 500 persona pa aña. Esaki ta nifica, cu anualmente nos poblacion ta aumenta pa motibo di nacemento mas o menos 700 persona pa aña.

POBLACION DI HENDE GRANDI
Den cuadro di mantencion di nos sistema di seguridad social, manera AZV y pension di behez, ta importante pa nos sigui di cerca e desaroyonan den e poblacion di hendenan grandi, personanan riba 60 aña. E poblacionnan aki a bin ta aumentando den forma constante. Na fin di luna di september 2006, un total di 13.278 habitante di nos isla tabata riba 60 aña di edad. Na final di 2001 nos isla tabata conoce 10.629 persona riba 60 aña. Esaki ta nifica cu den practicamente 6 aña e poblacion en cuestion a aumenta cu un 25%. Sigur un desaroyo pa tene bon cuenta cun’e.
Pa loke ta e crecemento annual, aki ta sigui un bista di esaki durante e ultimo añanan:
2002: 425
2003: 474
2004: 589
2005: 672
2006: 487 (3 cuartal).
E cifranan di ultimo 5 añanan ta mustra con constante e aumento ta y 2006 lo no ta diferente.

MIGRACION
E factor determinante den crecemento di nos poblacion desde 1986 ta migracion. Esaki ta e saldo di imigracion y emigracion. Pa loke ta 2006, e cifranan ta refleha e maneho estricto di admision cu ta keda implementa. Durante e prome 3 cuartalnan e poblacion di Aruba e crece cu 461 persona cu a bin establece nan mes na Aruba. Y den e di 3 cuartal mes por papia di un saldo negativo (57) di migracion. Durante e cuartal den mencion, 731 persona a establece nan mes mientras cu 788 a bandona nos isla.
E saldo di migracion pa personanan cu no tin nacionalidad hulandes tabata uno positivo: 280. E otro 181 ta personanan cu nacionalidad hulandes.
E saldo di migracion pa e ultimo añanan ta como lo siguiente:
2001: 784
2002: 533
2003: 1.518
2004: 2.209
2005: 2.269
2006: 461

Mi ta spera di pronto por ricibi informacion ariba e edad di e personanan cu ta bine stablecenan mes na Aruba y di ki nacionalidad nan ta.

Edwin Jacobs

Thursday, January 4, 2007

SALARIO MINIMO DI ARUBA, UN DI E MAS HALTONAN DEN CARIBE

Aumento di productividad mester ta un prioridad

Na final di 2006, Parlamento di Aruba a aproba e ley pa aumenta salario minimo t'e cu 1.460 florin pa luna. E aumento aki ta den cuadro di aumento di costo di bida y un parti ta compensacion pa introduccion di BBO. Ta interesante pa den e cuadro di discusionan cu tin na Aruba pa nos para un rato keto y pone esaki den perspectiva di desaroyonan den nos region. Y hustamente siman pasa a sali un aviso di Direccion di Asuntonan Laboral di Antiyanan Hulandes, den cual nan ta anuncia e salarionan minimo pa Antiyas.
E siguiente informacion a keda publica:
Curaçao : 1.063,45
Bonaire : 1.066,91
St. Eustatius: 1.008,02
Saba: : 1.059,98
St. Maarten : 1.349,23

Ta na su lugar pa remarca cu Antiyas, Aruba y algun islanan cu ta depende di negoshi di off-shore, manera Turcs and Caicos, ta ser considera e paisnan den nos region cu e GDP mas halto y un nivel di bida halto tambe. Y ora nos compara nos salario minimo cu e paisnan aki, nos ta constata cu nos salario minimo ta un, si no ta esun, di mas halto den nos region.

Preocupacion di out-pricing ta hustifica
Bisando cu nos salario minimo ta esun di mas halto di Caribe no ta nifica un bentaha sin mas. Y aki mester menciona cu e preocupacion cu cierto sectornan den comunidad tin pa loke ta e posible out-pricing, esta di ta un isla caro, ta hustifica. Pero na mes momento mester comberti e preocupacion aki den un reto. E reto ta pa logra aumenta productividad cu mes of menos trahador. Esaki por ta solamente positivo pa nos pais, mirando cu nos forza laboral pa un parti grandi ta importa. Y aki ta unda nos gremio comercial mester pone mas atencion. Con nos por produci mas manteniendo nos costo laboral abao. Ehempelnan di paisnan cu a haci esaki ta legio. Solamente masha poco nos ta papia di esaki na Aruba, apesar cu IMF tambe ta recomenda esaki. Aumento di productividad ta nifica cu doñonan di trabao mester bay pensa mas mihor henter na forma di organisa nan negoshi. Mester stimula trahadornan. Mester busca opcionnan tecnologico pa eleva e produccion. E no ta un ehercicio facil den un economia di servicio, pero si no haci e intento, nos no ta haya sa unda si por haci e ahustacionnan. Pues, mi ta comprende e preocupacion di out-pricing, pero mi ta mira esaki mas como un reto pa nos mundo comercial na Aruba. Di otro banda mi ta satisfecho cu nos tin un salario minimo cu ta permiti un bida digno riba nos isla. Cu tin cos pa mehora, esey ta sigur. Na tur pais na mundo ta mescos. Pero cu positivismo y gana pa traha, nos por sigui mehora nos pais.

Edwin Jacobs

Monday, January 1, 2007

Bon bini 2007

2007 a haci su entrada. Despues di algun dia di un poco turbulencia politico, 2007 a haci su entrada. Mi ta mira un 2007 hopi positivo pa nos pais, banda di un cantidad di reto. Y manera semper, e cosnan positivo tin efecto di termino cortico, mientras e retonan ta sinta den prepara pa nos isla atende cu asuntonan di termino medio y largo. Pero lamentablemente den politica na Aruba, nos ta ocupa nos mes demasiado cu cosnan chikito y di presente, mientras of nos no ta comprende of nos no kier comprende desaroyonan di medio y largo plazo. Cu e consecuencia cu e espacio ya limita cu bo tin como pais pa guia bo desaroyo, ta keda entrega of mihor bisa regala na suerte di bida. Pero esaki no por descurasha esnan cu si ta mira medio y largo plazo y nos mester keda mustra ariba e oportunidadnan cu den futuro tin pa nos.

Ariba tereno local, 2007 lo brinda hopi oportunidadnan. Si mira economia, nos ta spera un bon crecemento economico, semper y cuando e maneho di promocion di turismo duna e resultado cu gobierno ta spera di dje. Construccionnan lo sigui y esaki lo contribui na crecemento.

Ariba tereno di labor, e tension cu nos a caba aña cun'e ariba mercado laboral lo bira mas agudo. Sigur esaki ta consecuencia di e maneho estricto di admision, cual mi ta apoya completamente. Despues di otro aumento di salario minimo, na e nivel di mas halto den Caribe, mi tin e confianza cu esaki lo impulsa doñonan di trabao pa duna e trahadornan na otro nivel tambe nan participacion den desaroyo economico. E positivo di e dos desaroyonan aki, esta aumento salario minimo y admision restringui, ta cu companianan mester bay enfoca riba aumento di productividad como caminda pa haya mas entrada y mas ganashi. Mi ta spera cu definitivamente e era di crecemento mediante importacion ilimita di trahador ta pa pasado. E sistema ey sigur no ta contribui na un desaroyo economico y social duradero. Na diferente ocasion mi a expresa cu desaroyo economico di Aruba mester ta na interes y adelanto di Aruba y no na interes di inversionistanan pa haci mas ganashi. Si nos tin cu crece mediante trecemento di trahadornan di afor, cu nos ta pone nan biba den casnan inadecua, bao situacionnan socialmente no aceptable, mi no ta kere cu Aruba a gana. Creacion di situacionnan socialmente inaceptable pa creacion di bomnan social cu ningun di nos no sa ki dia ni ki ora e ta explota. Esnan cu ta pensa termino cortico lo apoya ciegamente e pensamento di crece economia pa e inversionista, pero tin otro pensamentonan tambe.

Ariba tereno di enseñanza tambe nos lo conoce retonan importante. Despues di e ciclonan di inovacion den enseñanza secundario, gobierno lo inicia cu papiamento den enseñanza basico. Nos mester sigui esaki cu wowonan critico. Sigur si considera cu papiamento su ortografia, manera poni den ley di 1976, no ta keda respeta den enseñanza. Verder un aña di reto atrobe pa wak con ta bay atende cu e demanda grandi pa inversionnan necesario.

Ariba tereno di husticia, e wowonan lo ta dirigi ariba e Alto Comisario nobo. Sigur despues cu parti di un rapport di Forensic Services a lek den prensa, e Alto Comisario nobo lo mester presenta cu solucionnan rapido pa e situacionnan preocupante cu nos a tuma nota di nan den prensa, cual nos ta spera cu pronto Ministro di Husticia informa Parlamento al respecto.

Airba tereno di Reino, e formacion di gobierno hulandes lo mester tin nos atencion. Cu un CDA den driving seat, acompaña pa un profesor Hirsh Balin, nos mester keda riba un alerta. Profesor Balin ta conoci pa ta un persona influyente den CDA, ademas di tin su pensamentonan basta bon formula pa loke ta e futuro cu e ta kere ta beneficia Aruba. Asina ela logra di haya partidonan den coalicion di Kabinete Balkenende II asina leu di pone den acuerdo di gobernacion cu Hulanda lo busca posicion di UPG pa nos. Como miembro di Raad van State di Reino, hunto cu otronan, a saca un rapport cu pensamentonan cla encuanto nos relacion cu Union Europeo. Awor cu e ta bek como ministro, den pleno centro di poder hulandes, no tin duda cu e lo trata di cristalisa su pensamentonan. Pesey nos aki banda mester ta extra alerto. Di PvdA, ruman partido, nos no ta spera mucho cos. Nos historia cu PvdA ariba tereno di structura estatal no ta di gaba. Ultimo añanan e acercamento ta mas mihor, pero un cos ta den oposicion y otro ta den gobierno. Christen Unie semper tabata positivo pa cu nos, pero atrobe CU ta keda un partido chikito cu lo tin nan prioridadnan otro caminda. E desaroyo aki ta haci e tri-partiet otro siman uno interesante. Cu algun cara nobo den e comision di tweede kamer, e trabao di lobby ta bira uno importante atrobe. Pesey no keda straño si boso topa miembronan di nos partido cenando of bebiendo algo cu parlamentarionan hulandes, ta un trabao di acercamento nos ta haciendo.

Di e gabinete nobo hulandes ta depende e negociasionnan cu lo bay tin mas den final di 2007 pa loke ta terenonan di entre otro husticia.

Mi no kier bay mas den extenso, pero cu e highlightnan aki mi ta spera di a indica cu pa 2007 ta un aña exitoso atrobe, nos mester traha duro. Tanto mi persona como boso representante como boso como esnan cu tambe tur dia di nobo mester lanta cu animo bay traha. Traha pa trece pan riba mesa pa boso famia, cual na su turno ta hiba nos pais tambe dilanti. Un bon 2007 yena cu bendicion, salud y hopi felicidad. 2007 ta bo aña, haci'e di bo.

Edwin Jacobs

Wednesday, December 27, 2006

ACUSACIONNAN DI MIKE EMAN DEN DIRECCION DI GOBERNADOR TA CONDENABLE Y INACEPTABLE

Un biaha mas Mike Eman ta mustra di ta masha onsportief ora e no haya su kier. Despues cu su intento di tuma over presidencia di Parlamento a faya siman pasa, awor e ta haya ta bon pa trata di trece duda den e persona di Gobernador di Aruba. E hecho aki mi ta condena categoricamente y ta haya tipo di politiqueria asina inaceptable. Gobernador di Aruba ta un figura a-politico cu no mester keda mescla den ningun discusion politico y mucho menos den politiqueria. Y hustamente pa esnan cu den pasado a opta pa mara mannan di Gobernador.

Gobernador como huez constitucional
Ora sr. Eman bisa pueblo cu Gobernador mester bay determina si e ta firma e ley y hunto cu otronan e ta manda carta pa Gobernador pa no firma esaki den cuadro di un discusion riba interpretacion di reglamento di ordo di Parlamento, sr. Eman kier pone Gobernador hunga e papel di un huez constitucional. Y e papel aki sr. Gobernador no a keda encarga cun’e y nunca por keda encarga cun’e tampoco, mirando cu e ta pone Gobernador den un discusion politico cu ta afecta solamente su funcion. Y hustamente Gobernador den nos sistema estatal ta un figura para riba tur partido y cu ta mara fuertemente na ley. Y hasta ta asina cu ta Prome Ministro ta carga responsabilidad politico pa loke Gobernador ta haci y keda sin haci. E hecho cu sr. Eman ta trata di hinca Gobernador den e posicion ey, mester keda considera como un abuso di marca mayor. Sr. Eman sa masha bon cu hamas sr. Gobernador por Sali defende su mes, ya cu e ta cay bao responsabilidad ministrial. Abusando di e posicion dificil di Gobernador, sr. Eman ta expone Gobernador na opinion publico, introduciendo su persona den un discusion netamente politico.

Caso Glenbert Croes
Y hilaridad di e asunto aki ta cu ta netamente AVP tabata e partido cu den pasado a dicidi di mara mannan di Gobernador. E caso ta cu despues di eleccion di 1997, caminda AVP pa sirbi su interesnan particular a nenga un zakenkabinet cu MEP, a dicidi di sigui cu OLA den gobierno. Na momento di a presenta sr. G. Croes como ministro, kende su integridad tabata den duda pisa, Gobernador a nenga su candidatura den cuadro di bon gobernacion. Partido AVP cu miedo di enfrenta un otro eleccion, a reacciona formando un comision bao presidencia di sr. van der Griendt. Y e comision aki su conclusion principal ta cu nombracion di ministronan ta un asunto exclusivo di Parlamento. Y cu Gobernador no tin ningun papel di hunga den e tarea di garantisa bon gobernacion riba nos isla. Y e rapport di e comision aki a conduci cu a mara mannan di Gobernador den cuadro di su tarea di Reino y t’e awe e rapport ta vigente. Y awe ta hustamente partido AVP ta exigi pa Gobernador actua otro y asumi responsablidad politico.

Tarea di Gobernador
Ora tende sr. Eman papia riba Gobernador, ta bon pa nos tin na mente e tarea cu Gobernador tin na momento di firma leynan. Articulo 21 di reglamento di Gobernador ta masha cla riba esaki. E articulo ta prescribi cu prome cu Gobernador firma un ley cu e ricibi, e mester determina cu esaki no ta encontra di Statuut, tratadonan internacional, ley di Reino, un decreto gubernamental di reino of di interesnan di cual Reino ta para garantia pa nan. Y aki nos ta constata cu ningun disputa crea pa minoria den Parlamento ta forma parti di esaki. Gobernador ta toets e concepto di ley na otro leynan mas halto cun’e y si nan no ta conflictivo, sr. Gobernador ta bay over na firma. Hasta si Gobernador ta pensa cu e ley ta conflictivo, no ta na Gobernador pa dicidi esaki, pero na Gobierno di Reino. Pesey e intentonan di AVP y su alianza pa trece posicion di Gobernador den discusion ta nada mas cu un atake directo di AVP ariba Gobernador. Un biaha mas nos ta condena esaki totalmente.
Sr. Eman, cu su derecho, a trata di haci lo posible pa evita e ley di BBO. Cu su derecho, sr. Eman a pasa riba otronan convertiendo su mes de facto como lider di MPA y RED hunto. Pero na final sr. Eman su sentido democratico tambe mester mustr’e cu den democracia e mayoria ta esun cu ta dicidi, despues di considera loke minoria presenta. Y den e caso aki e mester yega na acepta cu e mayoria den Parlamento a aproba e ley di BBO. En bes di sinta tira lodo riba institutonan a-politico, e mester acepta regla basico di democracia. Y un dicho pa e corda semper: el que de espada vive, de …….

Edwin Jacobs

Saturday, December 23, 2006

LEY DI BBO FIRMA Y PROCLAMA COMO LEY

Despues cu Parlamento di Aruba a duna su aprobacion den forma unanime na e ley di BBO, awe nos a keda informa cu sr. Gobernador y demas ministronan responsable a firma esaki y ela keda proclama den Gazeta Oficial di Aruba como un ley cu ta drenta na vigor entrante prome di januari 2007.

Nota di cambio
Durante tratamento di e ley di BBO den Parlamento, gobierno a presenta Parlamento un nota di cambio. Den e nota aki gobierno a cambia e ley di salario minimo pa pone esaki na 1.460 florin pa luna. Ademas a introduci un tarifa diferente pa empresanan cu ta exporta y cu no ta estableci den Free Zone. E tarifa aki ta 1%.

Un decision dificil, pero sirbiendo interes general
E decision di introduccion di BBO no tabata un decision facil. Sigur ora nos tabata conciente cu e ta bay afecta interes di esnan cu poder economico den nos comunidad. E grupo aki ta un grupo poderoso y cu ta domina hopi sector den nos comunidad. Pueblo mes por a determina con e grupo aki ta domina partidonan politico y lidernan sindical. Hamas desde Status Aparte por a mira un grupo asina grandi sirbi un solo interes particular. E loke nan a lubida den henter e asunto aki tabata cu poder di placa no ta tur cos riba mundo. Cumprando lidernan politico y lidernan sindical, no ta nifica cu bo tin pueblo bo tras. Gobierno di MEP y tur integrante di partido MEP a traha masha duro mes pa splica pueblo e otro banda di e medaya. Y mirando e asistencia pober na e manifestacionnan cu e aliansa monstruoso aki a organisa, tabata definitivo cu pueblo no ta sostene e organisacionnan aki.
Nos a tuma un decision dificil, pero semper pensando con pa sirbi e interes general mas mihor. Semper pensando con nos por garantiza nos hendenan un mas y mihor calidad di bida. Nos tin fe y conviccion cu nos lo alcanza e metanan cu nos ta propone nos mes y a compromete cu pueblo. For di aki mi ta desea di felicitia Ministro Swaen, kende tabata esun encarga cu e tarea dificil aki di prepara, defende y introduci e ley di BBO. Y keremi, ainda su trabao dificil no a termina. E implementacion ta mes of mas importante ainda. Nilo, pabien y forza pa sigui cu e trabao na bienestar di pueblo engeneral.

Edwin Jacobs

SECUESTRO DI STOEL DI PRESIDENCIA DI PARLAMENTO TA UN ATENTADO ORDINARIO CONTRA DEMOCRACIA

Tratamento di BBO, completamente legal

Diahuebs atardi durante tratamento di e punto di agenda di concepto ley di iniciativa den cuadro di verlof di embrazo, Parlamento a keda confronta cu acto nunca bisto den historia parlamentario di nos pais. Den nan ultimo intento pa para e tratamento y introduccion di e ley di BBO, oposicion a bay over na secuestra e stoel di Presidente di Parlamento. Dicho acto ta ser considera como un atentado contra democracia di nos pais.

E caso
E agenda pa trata durante e reunion publico aki tabata indica cu di dos punto di agenda lo ta e ley iniciativa relaciona cu verlof di embrazo, sigui pa tratamento di e concepto di ley di BBO. Pa e concepto di ley iniciativa, Presidente di Parlamento, sra. Ras, ta figura como un di e parlamentarionan cu e tuma over e iniciativa na 2001. Na momento cu sra. Ras a dicidi cu e ta bay defende e concepto di ley aki, nos mester aplica nos reglamento di ordo di Parlamento di Aruba. E reglamento di ordo ta prescribi cu na momento cu Presidente di Parlamento dicidi di participa na discusion y debate den reunion publico, ta surgi e vacatura di e presidente di e reunion. E prome miembro pa yena e vacatura aki ta e vice-presidente di Parlamento. Den e caso aki sra. Van Poppel-Marquez. Sra. Marquez tambe a dicidi como un di esnan cu a tuma over e iniciativa na 2001 di participa na e debate pa defende su trabao. Pues e vacatura ta keda habri. Segun nos reglamento di ordo, e siguiente cu ta bin na turno pa yena e vacatura ta e presidente di e periodo anterior. Aki a surgi un diferencia den interpretacion door di huristanan di Parlamento. Kiko realmente periodo anterior ta nifica. E kiermeen e aña parlamentario anterior of constelacion anterior. Na final a scoge pa e interpretacion di aña parlamentario. Esaki ta nifica cu e mes un dos miembronan cu a dicidi pa participa na e debate ta esnan yama pa yena e vacatura y esaki no por ta posible.
Segun reglamento e siguiente ta e miembro cu mas aña den Parlamento. E miembro en cuestion, sra. Haynes, no tabata presente y por lo tanto e vacatura a keda existi. Segun reglamento e siguiente ta e miembro di Parlamento cu mas edad. Den e caso aki esaki ta sr. Dumfries di fraccion di MEP. Pues, segun nos reglamento sr. Dumfries a asumi presidencia di e reunion pa tratamento di punto di agenda number 2. Esaki sin ningun protesta di ningun miembro di Parlamento. Asina e vacatura cu tabata tin pa presidi e reunion a keda yena segun nos leynan.
Despues di un suspencion merdia, e reunion a reanuda cu sr. Dumfries como presidente, conforme ley. Un dado momento sra. Haynes a presenta, firma lista di presencia y cuminsa exigi e funcion di presidente di reunion, cual no tabata disponible. Sr. Dumfries a continua cu e reunion pero e desordo di miembronan di fraccion di AVP tabata impedi e bon ordo di e reunion. E momento ey sr. Dumfries a suspende e reunion y a pidi griffier di Parlamento pa nan bay delibera con ta bay atende cu e desorden di miembronan. Na momento cu sr. Dumfries a lanta di e stoel di presidente, sra. Haynes a bay over na secuestra e stoel (gijzel), alegando cu e ta presidi e punto.

AVP ta robes
E ponencia di sra. Haynes y AVP ta completamente robes. E motibo ta cu na momento cu sra. Haynes a presenta na reunion no tabata tin e vacatura di presidente di e reunion. E vacatura aki a keda yena mainta na momento di a habri e punto y cu sra. Haynes no tabata presente. Pues mientras cu sr. Dumfries ta na e reunion e vacatura di presidente ta yena. E unico momento cu sra. Haynes por ocupa e posicion di presidente di e reunion tabata si en caso sr. Dumfries a renuncia e posicion di presidente. Cual sr. Dumfries ningun momento a haci. Pues sra. Haynes tabata bastante laat pa reclama un derecho. Mainta na momento cu sra. Ras a dicidi di bay den discusion, sra. Haynes tabata riba lista pa yena e vacatura, pero na momento cu a yena e vacatura, Sra. Haynes no por claim un vacatura cu no ta existi. Y pesey ta conclui cu e ocupacion ilegal di e stoel di presidente den sala di Parlamento ta nada otro cu un acto di secuestro.

Procedura pa libera e stoel
Den nos sistema parlamentario y den nos democracia, e stoel di Presidente di Parlamento ta simbolo hopi importante. Ta mediante eleccionnan liber, caminda pueblo di Aruba ta expresa su deseo pa su representacion, e constelacion di Parlamento ta keda determina. Y abase di e expresion popular y democratico, e Presidente di Parlamento ta keda eligi. Y e Presidente ta haya su honornan como tal den nos sala, mediante su stoel. Mescos cu un rey of reina tin su trono, simbolo di su posicion, un Presidente di Parlamento tin su stoel den sala di Parlamento, simbolo di su posicion. Y cualkier intento pa evita e expresion democratico y popular ta nada otro cu un atentado ordinario contra democracia. Y pesey di ora cu a tuma nota di e secuestro, Presidente di Parlamento, como autoridad maximo den Parlamento a cuminsa cu e proceduranan pa libera e stoel. Primeramente Presidente a convoca tur lidernan di fraccion cerca dje. Den e reunion aki ela haci e peticion na sr. Eman di AVP pa deshaci di e ocupacion ilegal di e stoel di Presidente. Sr. Eman retundamente a nenga di haci esaki. E siguiente paso tabata pa evalua uso di forza policial pa deshaci di e ocupacion ilegal. Aki e proceso a tuma hopi tempo mes. Primeramente mester a warda refuerzo policial. Despues a dicidi di trece Alto Comisario di Polis pa atende e caso, mirando cu nos ta tratando cu un caso di nivel hopi halto y cu ta atacha e principionan basico di nos pais, esta nos democracia.
Na momento cu Alto Comisario a yega y a delibera cu Presidente di Parlamento, e scenario extremo a keda pinta, abase di autoridad investi den nos Presidente di Parlamento. A opta pa no yega asina leu y Alto Comisario a bay papia cu sr. Eman, den un intento pa soluciona e secuestro di boluntad propio. Esaki atrobe tabata envano.

Mudamento di presidencia
Mirando e situacion tenso den publico y den Parlamento, a dicidi di busca e salida mas pacifico posible. Pa prome biaha den historia parlamentario di Aruba y di Reino y di mundo civilisa, a dicidi di muda presidencia di Parlamento for di e sitio instala p’e den sala pa e seccion destina pa gobierno. Aki e presidente legitimo di e reunion, sr. Dumfries a bay over na reanuda e reunion publico y conforme nos reglamento a wanta e tratamento di e punto di agenda number 2 y a suspende e reunion pa permiti Presidente di Parlamento asumi su funcion como presidente di e reunion.

DESALOHAMIENTO DI E STOEL
Asumiendo su tareanan, miembronan di fraccion di AVP den nan ultimo intento pa stroba henter e discusion y debate riba BBO a cuminsa ta insulta y ataca na un forma reprochable Presidente di Parlamento. Haciendo uso di e autoridad cu ley ta dun’e. Presidente a expulsa sr. Sevinger di AVP for di sala, bao escolta policial, despues cu ela duna e miembro aki 3 waarschuwing. Despues cu sr. Sevinger a keda saca di e sala, Presidente a pasa over pa desaloha e stoel di presidente. Despues di a pidi sra. Haynes tres biaha pa desocupa e stoel, Presidente a expulsa sra. Haynes for di sala, cu escolta policial. Di e forma aki, na un manera diligente, den cuadro di nos leynan, a libera e stoel di Presidente di Parlamento, simbolo di nos democracia, for di e secuestro di sra. Haynes y fraccion di AVP. Pa prome biaha Parlamento ta pasa den un situacion asina y ta logra na un forma legal, pero firme den conviccion di libera e stoel. Opositornan por papia di error di nobato, pero nos a costuma cu e insultonan di nos opositornan, tanto politico, prensa como otronan. E insultonan ey no ta afecta nos den nada. Loke ta conta pa nos ta resultado. Punto.

Edwin Jacobs

Thursday, December 21, 2006

AGENDA DI DIAHUEBS AMPLIA CU BBO Y INVOERRECHTEN

Ayera miembro di Parlamento a ricibi un convocatorio nobo pa e reunion publico di awe mianta 11'or. E agenda a keda amplia cu dos punto. E agenda ta como lo siguiente:
1. Correspondencia
2. Concepto di ley iniciativa pa cambia ley civil, ley di aseguro di malesa y ley di aseguro di accidente.
3. Concepto di ley regardando BBO
4. Concepto di ley pa ratifica e decreto gubernamental; pa cambia articulo 127 do ley di in-, uit- y doorvoer.

Pa loke ta e contestanan di gobierno riba e preguntanan di Parlamento, mi tin esaki nan disponible. Si tin persona interesa, comunica esaki na ejacobs@setarnet.aw.

Edwin Jacobs